Vidic og Evans ekki með United um helgina

Sir Alex Ferguson, stjóri Man. Utd, greindi frá því í dag að þeir Nemanja Vidic og Johnny Evans verði ekki með Man. Utd um helgina í opnunarleiknum gegn Birmingham.

Hann er þó bjartsýnn á að Wes Brown verði til í slaginn.

„Wes Brown og Gary Neville eru báðir byrjaðir að æfa með aðalliðinu. Wes er kominn lengra en Gary og gæti spilað," sagði Ferguson og bætti við að Evans ætti að verða tilbúinn á miðvikudag.

Ferguson býst einnig við Rio Ferdinand í slaginn þó svo hann hefði meiðst lítillega með landsliðinu gegn Hollandi.

Sömu sögu er að segja af Nani sem fór úr axlarlið í leiknum um Samfélagsskjöldinn. Hann hefur náð ótrúlegum bata og er með sem og Ben Foster markvörður.