Heimir Hallgrímsson: Ætluðum að halda hreinu

Heimir Hallgrímsson þjálfari ÍBV sá markmið sitt fyrir leikinn á Hlíðarenda hverfa eftir aðeins átta sekúndur þegar Pétur Georg Markan skoraði fyrra mark Vals í kvöld.

"Þó það sé kannski kjánalegt að segja það núna þá lögðum við leikinn upp með því að halda hreinu og plan var farið eftir 8 sekúndur," sagði Heimir eftir leikinn í kvöld.

"Þetta var kjaftshögg fyrir okkur. Ég er með ungt lið og ég sá það á mönnum að þeir voru hikandi eftir þetta og áttu erfitt með að halda boltanum. Menn földu sig og það var hugleysi í liðinu en miðað við að við erum með fimm annars flokks peyja í liðinu þá er þetta ósköp skiljanlegt."

"Mér fannst ekki vera rétt að færa liðið framar í fyrri hálfleik en við ákváðum í hálfleik að setja svolítið á þá og það virkaði. Í rauninni fannst mér við spila seinni hálfleikinn eins og við ætluðum að spila allan leikinn."

Það hefði verið gaman að fá mark í þetta en Valsarar komust í 2-0 og eftir það var leikurinn búinn," sagði þjálfari ÍBV að lokum.