Robinho: Ætlar að vinna enska titilinn en ekki að fara til Barcelona

Brasilíumaðurinn Robinho hefur ekki áhuga á að fara til Barcelona þegar félagsskiptaglugginn opnar aftur í janúar en áhugi spænsku Evrópumeistaranna á þessum snjalla Brassa hefur verið mikið í fréttum síðustu daga. Robinho ætlar þess í stað að hjálpa Manchester City að vinna enska meistaratitilinn.

„Félagið hefur háleit markmið og það hefur líka sannast á félagsskiptamarkaðnum. Við erum með sterkara lið en í fyrra og getum ráðið við öll lið," sagði Robinho.

„Við höfum fengið frábæra leikmenn en nú verðum við að átta okkur á því að við verðum að vera sterkari andlega. Við höfum nefnilega allt til þess að bera til þess að vinna enska titilinn," sagði Robinho.

„Því meira sem ég hugsa um það því sannfærðari er ég að þetta verði okkar ár," sagði Robinho við enska slúðurblaðið The Sun.