Grétar: Sýndum að við getum lifað án Jónasar

Grétar Sigfinnur Sigurðsson var búinn að koma KR-ingum í 1-0 eftir aðeins 11 mínútur í sínum fyrsta leik sem fyrirliði liðsins.

„Mér fannst við vera frábærir fyrir utan einbeitingarleysi einstaka sinnum. Við vorum að stjórna leiknum allan tímann en við fengum á okkur leiðindamark. Við kvittuðum fyrir það og vorum fljótir af því sem sýnir bara karakterinn í liðinu," sagði Grétar Sigfinnur Sigurðarson sem bar fyrirliðabandið í KR-liðinu í fyrsta sinn í kvöld.

„Þetta er að smella saman hjá okkur. Evrópukeppnin gefur okkur auðvitað extra sjálfstraust í að þora nýta það sem við höfum. Við skorum fimm mörk og áttum að skora fleiri," sagði Grétar ánægður í leikslok.

„Það er draumurinn fyrir uppalinn KR-ing að fá að vera með fyrirliðabandið. Maður er að reyna að feta í fótspor merkra manna eins og Þormóðar Egilssonar og fleiri sem hafa borið fyrirliðabandið með sóma fyrir KR-liðið. Það er draumi líkast að fá að koma aftur og verða síðan fyrirliði," sagði Grétar.

Þetta var fyrsti leikur KR-liðsins síðan að Jónas Guðni Sævarsson fór til sænska liðsins Halmstad.

„Jónas var frábær, frábær fyrirliði og frábær fyrirmynd. Það er leiðinlegt að missa hann en samt sem áður sýndum við að við getum lifað án hans," sagði Grétar.