Hafþór Ægir: Tapa sjaldan fyrir KR

Hafþór Ægir Vilhjálmsson leikur í kvöld sinn fyrsta leik í búningi Þróttar þegar liðið tekur á móti KR í Pepsi-deildinni. Hafþór er lánaður frá Val út tímabilið og mætti hann á sína fyrstu æfingu hjá félaginu í gær.

„Þetta er allt svo nýbúið að gerast að ég er eiginlega ekki búinn að átta mig á þessu," sagði Hafþór við Vísi. „Ég er fullur tilhlökkunar, það er langt síðan ég hef spilað tapleik gegn KR og ég ætla ekki að fara að byrja á því í kvöld."

Þróttarar verma botnsæti deildarinnar en KR-ingar eru hinsvegar í öðru sætinu.

„Valsmenn voru tilbúnir að lána mig og ég var alveg til í að skipta aðeins um umhverfi. Það hafa verið einhverjar þreifingar frá því í vor. Það komu einhverjir fjórir leikir í röð þar sem ég spilaði ekkert og það var svekkjandi," sagði Hafþór.

„Mér lýst vel á þetta hjá Þrótti og mér sýnist vera hugur í mönnum að fara að rífa inn stig. Þó ég sé nýkominn þá finn ég það á mönnum að allir eru tilbúnir að taka stig í kvöld. Það er ekki leiðinlegt að spila á móti KR. Sérstaklega þegar maður hefur sjaldan tapað á móti þeim, það er þægileg tilfinning."

Hafþór Ægir segist ekki vita hvað tekur við hjá sér eftir tímabilið. „Það hefur ekkert verið rætt. Það var bara gerður lánssamningur út þetta tímabil og svo er óráðið hvað gerist eftir það," sagði Hafþór.

Leikir kvöldsins í Pepsi-deild karla:

19:15 Grindavík - Fjölnir

19:15 Valur - Keflavík

19:15 Þróttur - KR

20:00 Fylkir - Fram (Stöð 2 Sport)

Fylgst verður grannt með gangi mála í leikjum kvöldsins á Boltavakt Vísis.