Sjö óku undir áhrifum fíkniefna

Um helgina voru sjö ökumenn teknir á höfuðborgarsvæðinu fyrir að aka undir áhrifum fíkniefna. Þetta voru fimm karlar á aldrinum 17 til 22 ára og tvær konur, 19 og 22 ára. Fjórir þessara ökumanna voru stöðvaðir í Hafnarfirði, tveir í Reykjavík og einn í Kópavogi.

Einn þeirra var nýlega sviptur ökuréttindum með dómi, annar hefur aldrei öðlast ökuréttindi og sá þriðji, sem jafnframt er sá yngsti í þessum vafasama hópi, fékk ökuskírteinið í hendur fyrir fáeinum vikum.

Þá voru átta ökumenn teknir fyrir ölvunarakstur í umdæmi lögreglunnar á höfuðborgarsvæðinu um helgina. Sjö voru stöðvaðir í Reykjavík og einn í Kópavogi. Þetta voru sjö karlar á aldrinum 19 til65 ára og ein kona, 19 ára. Einn þessara ökumanna hefur aldrei öðlast ökuréttindi.