Margar fyrirspurnir í skoðun

„Samkeppnishæfni Íslands hefur aldrei verið meiri og fyrirspurnum frá erlendum fjárfestum fjölgað," segir Þórður H. Hilmarsson, framkvæmdastjóri Fjárfestingarstofu Íslands.

Þórður flytur erindi um fjárfestingar í nútíð og framtíð á vegum Fjárfestingarstofu, iðnaðarráðuneytis og Útflutningsráðs í næstu viku. Þar verður fjallað um beinar erlendar fjárfestingar í víðu samhengi og tækifærin sem hér eru.

Þórður segir tilgang ráðstefnunnar eiga að vekja athygli á þýðingu og áhrifum erlendra fjárfestinga á uppbyggingu atvinnulífsins. Ekki síst beinist hún að því að greina frá þeim fjölmörgu tækifærum sem nú séu að fæðast á mun fleiri sviðum en nú þekkist.

Þórður telur mikilvægt að færa umræðuna um þennan málaflokk af því stigi að bein erlend fjárfesting snúist einvörðungu um álver, stóriðju eða annan orkufrekan iðnað. Tækifærin séu mörg og þau eigi að nýta fremur en að reisa þeim skorður.

Á ráðstefnunni verður greint frá nokkrum dæmum um nýlega erlenda fjárfestingu. Þar verður til dæmis fjallað um erlendar fjárfestingar út frá samfélagslegri ábyrgð fyrirtækja og kynntar niðurstöður um afstöðu Íslendinga til fjárfestinga erlendra aðila hér á landi.- jab