Aquilani: Ég mun sanna mig hjá Liverpool

Alberto Aquilani er sannfærður um að hann muni sanna sig í herbúðum Liverpool þegar hann fær tækifæri til þess.

Aquilani er meiddur og hafa því stuðningsmenn Liverpool enn ekki séð hann spila í búningi félagsins síðan hann kom frá Roma nú í sumar.

Hann gekkst undir aðgerð á ökkla og er nú í stífri endurhæfingu.

„Ég veit að Liverpool hefur eytt stórfé í að kaupa mig en ég ætla að sýna að ég sé þess virði," sagði Aquilani í samtali á heimasíðu Liverpool.

„Ég hef mjög gaman af því að horfa á leiki í ensku úrvalsdeildinni þó ég geti ekki dæmt um hvort þetta sé besta knattpyrnan í Evrópu."

Hann hældi mjög bæði Steven Gerrard og Fernando Torres. „Þetta eru sannir meistarar sem geta skipt sköpum í leikjum. Ég er hæstánægður með að spila við hlið þeirra og vona að ég geti bætt mig sem knattspyrnumaður."