Læknarnir í Róm gerðu mér enga greiða

Alberto Aquilani er ánægður með að vera kominn í hendur lækna Liverpool þar sem þeir hjá Roma á Ítalíu gerðu honum enga greiða.

Aquilani er nú að jafna sig á ökklaaðgerð en hann hefur mátt þola þrálát meiðsli undanfarin ár. Hann þykir með þeim betri á Ítalíu þegar hann er heill en um tíma var óttast að ferli hans væri að ljúka vegna meiðslanna.

„Ég geri mér grein fyrir því núna að það var ekki að hjálpa mér hvernig staðið var að hlutunum á Ítalíu," sagði Aquilani í samtali við enska fjölmiðla.

„Gott dæmi eru ökklameiðslin mín. Læknarnir héldu að þetta væri eitthvað smávægilegt vandamál og sögðu mér að halda áfram að spila. Svo þurfti ég að fara í aðgerð."

Hann sagði að helsta vandamálið hjá Roma var að það var sífellt verið að skipta um lækna hjá félaginu.

„Ég er svo ánægður með að vera kominn til Liverpool, ekki bara knattspyrnuferilsins vegna heldur almenns heilsufars einnig. Ég hef þegar merkt mun á mér."