Stórstjörnur Man City fá enga miskunn

David Dunn, miðvallarleikmaður Blackburn, hefur varað við því að stórstjörnum Manchester City verði engin miskunn sýnd þegar þeir mæta á Ewood Park í leik liðanna í fyrstu umferð ensku úrvalsdeildarinnar um helgina.

Eigendur City hafa eytt næstum 100 milljónum punda í leikmannakaup í sumar og bíða margir spenntir eftir því að sjá hvernig leikmenn eins og Emmanuel Adebayor, Carlos Tevez og Gareth Barry ná saman.

„Það er mikilvægt að við gerum okkar besta og við ætlum að taka í lurginn á þeim - innan löglegra marka að sjálfsögðu," sagði Dunn í samtali við enska fjölmiðla.

„Við verðum að vera sterkir fyrir og skipulagðir. Aðalmálið er að við verðum að vera harðir í horn að taka og láta þá aðeins finna fyrir okkur. Við þurfum að sjá til þess að engum liðum finnist gaman að koma á Ewood Park."