Segir hugsanlegt fósturforeldri lofa hvolpi

„Hún er búin að lofa honum hvolpi," segir Helga Elísdóttir, amma níu ára drengs sem átti að senda í fóstur á föstudaginn af Barnaverndarnefnd Reykjavíkur. Lögfræðingur Helgu, Dögg Pálsdóttir, kvartaði hinsvegar undan málsmeðferðinni og því hefur verið frestað að senda drenginn í fóstur. Að sögn Helgu þá er drengurinn núna í neyðarvistun í Reykjavík. Sjálf fær hún aðeins að umgangast hann í einn og hálfan tíma.

Hún fullyrðir hinsvegar að umsækjandinn, eins og Helga kallar það, og er hugsanlegt fósturforeldri drengsins fari hann í fóstur, hafi umgengist hann tímunum saman og lofað drengnum hvolpi komi hann til þeirra.

„Það er bara verið að rugla í barninu," segir Helga en hún segir hugsanlega fósturforeldrið hafa umgengist drenginn í allan gærdag á meðan hún sjálf mátti aðeins verja einni og hálfri klukkustund með honum.

Lögmaður Helgu, Dögg Pálsdóttir, hefur kært málsmeðferðina til kærunefndar barnaverndarmála. Hún bendir á ýmsar brotalamir í meðferð Barnaverndar Reykjavíkur. Mál drengsins verður fyrst tekið fyrir á fundi nefndarinnar nú á þriðjudaginn. Þá verður ákveðið hvar barnið skal vera.

Móðir drengsins og dóttir Helgu átti við alvarlegt áfengisvandamál að stríða sem varð til þess að hún missti forræði yfir syni sínum. Hún segist ekki hafa bragðað áfengi í hálft ár.

Þegar haft var samband við Dögg varðandi umgengni hugsanlega fósturforeldrisins sagðist hún hafa heyrt af því og hygðist senda kvörtun og skýringar á því til Barnaverndar Reykjavíkur. Hún sagði að það væri afar óeðlilegt að manneskja umgengist barn þegar ekki væri búið að taka ákvörðun hvort barnið færi yfir höfuð í fóstur.

Málið hefur vakið mikla athygli undanfarið. Meðal annars hafa Breiðavíkurstamtökin fordæmt barnavernd í þessu máli.

Eins og fyrr getur Barnaverndarnefnd Reykjavíkur ekki tjáð sig um málið efnislega.