Santa Cruz í hnéaðgerð

Roque Santa Cruz, leikmaður Blackburn, verður frá í einhvern tíma eftir að hann gekkst undir aðgerð á hné í vikunni.

„Ég ætla ekki að setja tímamörk á hvenær hann snýr til baka en vonandi verður hann ekki lengi frá," sagði Sam Allardyce, stjóri Blackburn.

Hann hefur ekkert getað spilað síðan hann meiddist í markalausu jafntefli gegn Everton í byrjun mars.

Santa Cruz var sterklega orðaður við Manchester City í janúar síðastliðnum en ekkert varð úr því að hann færi þangað.

Allardyce hefur ekki marga leikfæra sóknarmenn í sínu liði. Jason Roberts og El-Hadji Diouf eru báðir frá vegna meiðsla, rétt eins og Santa Cruz, auk þess sem að þeir Matt Derbyshire og Paul Gallagher eru í láni hjá öðrum félögum.

Allardyce þurfti því að láta varnarmanninn Christopher Samba spila í sókninni er Blackburn tapaði, 4-0, fyrir Liverpool um síðustu helgi.