Bendtner vill skora 25 mörk fyrir Arsenal í vetur

Daninn Nicklas Bendtner ætlar að sanna sig í ensku úrvalsdeildinni í vetur og telur að þetta geti verið spútniktímabilið hans hjá Arsenal. Hann gerir sér þó grein fyrir því að hann þarf þá að fara að skora fleiri mörk en hann hefur gert til þessa.

„Ég hef ekki verið að skora nógu mikið og fólk hefur verið að hrósa mér fyrir aðra þætti leiksins. Ég hef bara skorað 10 mörk í 40 leikjum og það er ekki tölfræðin sem ég var að vonast eftir. Ég er vonast til að skora 20 til 25 mörk í 40 leikjum," sagði Nicklas Bendtner í viðtali við Politiken.

Bendtner segir þó að hann gæti bætt fyrri markaleysið með því að leggja upp mörg mörk fyrir félaga sína í Arsenal-liðinu. „Ef ég myndi aðeins skora 10 mörk en næði að gefa 30 stoðsendingar þá myndi það alveg sleppa," sagði Bendtner sem skoraði sitt níunda landsliðsmark fyrir Dani í 1-1 jafntefli á móti Portúgal um helgina.