Augljós mismunun hjá ríkisbönkunum

„Tillögur um stórkostlega fyrirgreiðslu ríkisbanka gagnvart einum aðila á markaði felur augljóslega í sér mismunun gagnvart öðrum," skrifar Sævar Freyr Þráinsson, forstjóri Símans, í aðsendri grein í Fréttablaðinu í dag.

Þar fjallar Sævar um frumvarp til nauðarsamninga Teymis, sem gerir ráð fyrir því að skuldir Teymis, Vodafone og Kögunar verði skrifaðar niður um þrjátíu milljarða króna. Sævar segir nauðsynlegt að eitt gangi yfir alla á samkeppnismarkaði.

„Að kollvarpa markaðnum þannig að þeim sé umbunað sem ekki standa sig er ekki bara ósanngjarnt heldur beinlínis hættulegt fyrir samfélagið til lengri tíma litið," skrifar Sævar. Það gangi jafnframt gegn úrskurði Samkeppniseftirlitsins, og erfitt sé að sjá að þessi aðferð geti samræmst ríkisstyrkjareglum samningsins um Evrópska efnahagssvæðið.

Sævar segir stjórnendur Teymis hafa keyrt fyrirtækið í þrot löngu áður en íslenska bankakerfið hafi hrunið. Eigið fé hafi farið úr því að vera jákvætt um 7,5 milljarða króna í að verða neikvætt um 25 milljarða á átta mánuðum.

Það sé því lágmarkskrafa að horft sé til annarra fyrirtækja á samkeppnismarkaði, ætli ríkisbankarnir sér að halda áfram að skrifa niður skuldir fyrirtækja sem hafi keyrt sig í þrot.