Horfur hafa batnað

Útlit er fyrir að halli ríkis­sjóðs verði minni í ár en áður var talið. Það skýrist af lægri vaxtakostnaði en reiknað var með og minna atvinnuleysi en spáð var. Um leið stefna tekjur ríkissjóðs – einkum af virðisaukaskatti – í að vaxa meira en ráð var fyrir gert.

Að þessu samantöldu gerir Steingrímur J. Sigfússon fjármálaráðherra sér vonir um að hægt sé að draga úr áður áformuðum skattahækkunum. Fjárþörfin hafi minnkað.

Steingrímur upplýsti þetta í umræðum um skatta á Alþingi í gær.

Bjarni Benediktsson, formaður Sjálfstæðisflokksins, hóf umræðuna og fann skattaáformum ríkisstjórnarinnar allt til foráttu.

Talsmenn annarra stjórnarandstöðuflokka voru á sama máli.

Bjarni sagði fjárlagagatið, sem stoppa þyrfti í, ekki stafa af skattalækkunum undanfarinna ára heldur því að skattstofnarnir hefðu brostið. Búa þyrfti svo um hnúta að þeir skiluðu á ný sömu tekjum og fyrr. Hann ítrekaði ágæti tillögu sjálfstæðismanna um skattbreytingu í lífeyriskerfinu; með henni væri hægt að brúa fjárlagahallann.

Sigmundur Davíð Gunnlaugsson, formaður Framsóknarflokksins, sagði ríkisstjórnina ekkert hugsa um verðmætasköpun og kvað ekki hægt að vinna sig út úr kreppu með því að hækka skatta. Benti hann á skattahækkanir í Bandaríkjunum í kreppunni miklu sem hefðu haft slæm áhrif. Skattalækkanir nýrrar ríkisstjórnar hefðu hins vegar gefist vel.

Þór Saari, Hreyfingunni, sagðist ekki fráhverfur skattahækkunum á einstaklinga en kolrangt væri að gera það núna; aðstæður byðu ekki upp á það. Hann vildi á hinn bóginn skattleggja atvinnugreinar sem byggðu starfsemi á sameiginlegum auðlindum þjóðarinnar.

Þráinn Bertelsson sagðist geta fullyrt að venjulegt launafólk væri ekki aflögufært; leita þyrfti uppi peningana þar sem þeir væru.

Helgi Hjörvar, Samfylkingunni, sagði ríkisstjórnina vera að reyna að skapa sátt um leiðir í skattamálum. Upphrópanir og heimsendaspár væru honum vonbrigði.

bjorn@frettabladid.is