Eftirmaður Alonso fundinn - Aquilani væntanlegur á Anfield

Fátt virðist geta komið í veg fyrir að miðjumaðurinn Alberto Aquilani muni ganga til liðs við Liverpool eftir að félagið náði í dag samkomulagi um kaupverð á leikmanninum við Roma.

Talið er að Liverpool muni greiða í kringum 20 milljónir fyrir ítalska landsliðsmanninn en félagið fær um 30 milljónir punda frá Real Madrid fyrir Xabi Alonso.

Knattspyrnustjórinn Rafa Benitez hjá Liverpool er hæst ánægður með að hafa fundið eftirmann Alonso.

„Alberto er frábær leikmaður og ég er gríðarlega ánægður með að við höfum náð samkomulagi við Roma. Hann kemur á Afield síðar í vikunni þar sem hann mun gangast undir læknisskoðun og skrifa undir samning.

Hann er fæddur leiðtogi og hefur reynslu af því að spila í efstu deild á Ítalíu og Meistaradeildinni," segir Benitez í viðtali á opinberri heimasíðu Liverpool um hinn 25 ára gamla miðjumann sem var á sínum tíma fyrirliði U-19 og u-21 ára landsliða Ítalíu.