Sjóðurinn ræður við íbúðalán bankanna

Forstjóri Íbúðalánasjóðs (ÍLS) segir að í raun sé ekkert sem komi í veg fyrir það að sjóðurinn geti tekið við öllum húsnæðislánum bankanna svo fremi sem stjórnvöld veiti til hans auknu fé í samræmi við aukin umsvif.

Fram kom í Fréttablaðinu í gær að innan ríkisstjórnarinnar sé vilji fyrir því að ÍLS taki yfir öll húsnæðislán stóru bankanna þriggja. Með þessari leið sé ætlunin að auðvelda það að bjóða upp á samræmd úrræði fyrir skuldara og tryggja jafnræði á milli þeirra.

Þessi leið er sú sem helst hefur verið rædd upp á síðkastið í ráðherranefnd um úrræði fyrir fólk í greiðsluerfiðleikum, sem stefnir á að skila af sér tillögum í vikunni eða í síðasta lagi strax eftir helgi.

Gísli Tryggvason, talsmaður neytenda, lýsti efasemdum með þessa hugmynd í samtali við Ríkisútvarpið í gær, og óttaðist að Íbúðalánasjóður myndi ekki valda því að fá lánin í fangið.

Guðmundur Bjarnason, forstjóri ÍLS, telur þessar áhyggjur hins vegar óþarfar. Sjóðurinn hafi í raun byrjað að undirbúa sig fyrir aðgerð af þessu tagi strax eftir bankahrunið í fyrrahaust, þegar umræða fór af stað um þennan möguleika. Tæknilega sé sjóðurinn því að mestu þegar í stakk búinn til að taka yfir lán bankanna.

Guðmundur segir að lán ÍLS nemi nú um 700 milljörðum og gert sé ráð fyrir að lán bankanna séu önnur eins upphæð.

„Það yrði því auðvitað um að ræða mikil aukin umsvif, ef þetta fer svo að Íbúðalánasjóður stækkar um helming," segir Guðmundur. Það myndi kalla á aukinn mannafla og húsnæði, og það væri þá stjórnvalda að ákveða með hvaða hætti þau myndu styðja betur við sjóðinn. „Þau þurftu nú að styrkja bankana fjárhagslega, þannig að mér dettur í hug að það gæti orðið einhver millifærsla í því."

Verið sé að skoða það hvernig ÍLS myndi meðhöndla erlendu lánin, sem sjóðurinn hefur aldrei boðið upp á sjálfur. Hugsanlegt sé að bankarnir myndu tímabundið halda utan um þau áfram í sínum innheimtukerfum, þótt þau færðust til ÍLS.

Þá telur Guðmundur ólíklegt að lífeyrissjóðslán yrðu færð til ÍLS. stigur@frettabladid.is