Framsóknarmenn vilja aðgerðir til bjargar skuldsettum heimilum

Þingflokkur framsóknarmanna hvetur ríkisstjórnina til að grípa tafarlaust til aðgerða til bjargar skuldsettum heimilum. Vandinn sé mikill og eykst dag frá degi. Þetta kemur fram í ályktun þingflokksins sem send var fjölmiðlum í dag.

Þar segir að allar raunhæfar tillögur ríkisstjórnarflokkanna sem miða að því að aðstoða fólk í greiðsluvandræðum og leiðrétta skuldastöðuna verða skoðaðar með jákvæðu hugarfari af hálfu framsóknarmanna.

Þingflokkurinn skorar á stjórnvöld að leita samstöðu með öllum þeim sem lagt hafa málinu lið og benda sérstaklega í því samhengi á Hagsmunasamtök heimilanna og nýtilkominn átakshóp um skuldastöðu heimilanna.