Wenger óhress með tilnefningarnar

Arsene Wenger, stjóri Arsenal, virðist vera fúll yfir því að eiga engan leikmann í hópi þeirra sem tilnefndir hafa verið sem knattspyrnumenn ársins á Englandi.

Þeir Nemanja Vidic, Rio Ferdinand, Edwin van der Sar og Cristiano Ronaldo frá Manchester United og Steven Gerrard frá Liverpool eru allir tilnefndir að þessu sinni, en Wenger er á því að standa ætti að valinu á öðrum tímapunkti.

"Ég held að þessar tilnefningar séu allar gerðar í febrúar, en það er ekki mikilvægasti tími ársins og það þýðir að þeir leikmenn eru verðlaunaðir sem spiluðu vel fram í febrúar. Apríl og maí eru mikilvægasti tími ársins," sagði Wenger.

"Eins og þetta er núna, á leikmaður sem er meiddur fram í janúar engan möguleika á að vera tilnefndur þó hann spili vel á mikilvægasta tíma leiktíðarinnar. Ef kosið yrði í maí, kæmu ef til vill einhverjir af mínum leikmönnum til greina," sagði Wenger.