Misskilinn forseti

Ólafur Ragnar Grímsson forseti hefur þrisvar sinnum þurft að leiðrétta erlendar fréttir um sjálfan sig síðan bankarnir hrundu. Ólafur hefur verið duglegur að ræða við erlenda fjölmiðla sem margir hverjir virðast misskilja orð forsetans. Nýjasta dæmið eru ummæli er varða innistæður sparifjáreigenda í Þýskalandi en áður hafði BBC misskilið forsetann sem og norskur sendiherra sem sat með honum hádegisverðarfund.

Í nóvember bárust fréttir af því að Ólafur Ragnar hefði húðskammað nágrannaþjóðir okkar á hádegisverðarfundi með erlendum erindrekum í Reykjavík.

Á vef norska ríkisútvarpsins sagði að erindrekarnir hafi vart trúað sínum eigin eyrum enda hafi forsetinn komið fram með móðgandi ásakanir á hendur Bretum. Vísað var til minnisblaðs norskra yfirvalda um fundinn og bent á að fulltrúar Svíþjóðar og Danmerkur hafi setið hann.

Í erlendum miðlum var því haldið fram að Ólafur hefði hótað því að leita nýrra bandamanna þar sem núverandi bandamenn hefðu svikið landið. Þá átti forsetinn að hafa viðrað þá hugmynd að Rússum yrði boðin aðstaða í gömlu herstöðinni á Keflavíkurflugvelli.

Skömmu síðar bárust fréttir af því að það væri fjarri lagi að forsetinn hefði tengt viðræður íslendinga við Rússa um lán við hugsanleg afnot þeirra af fyrrverandi herstöð Bandaríkjamanna á Íslandi á umræddum hádegisverðarfundi. Það var forsetaskrifstofan sem bara þetta til baka. Skrifstofan sagði fundinn hafa farið fram í danska sendiráðinu en forsetinn ætlaði ekki að tjá sig um þær umræður sem þar hafi farið fram. Þó var tekið fram að fréttaflutningur af fundinum væri ónákvæmur.

Um miðjan janúar sagði BBC síðan frá því að forsetinn væri enn að íhuga málsókn gegn Bretum vegna setningar hryðjuverkalaga þeirra gegn íslensku bönkunum. Þar á Ólafur að hafa sgt að Bretar hafi hagað sér eins og bullur gegn smáþjóð í aðgerðum sínum.

Skömmu síðar barst leiðrétting frá Örnólfi Thorssyni forsetaritara sem sagði misskilnings hafa orðið til þess að fullyrt hefði verið að Ólafur íhugaði málsókn á hendur Bretum. Hann asgði Ólaf hafa sagt að hugleiðingar væru enn um málsókn á hendur Bretum af hálfu íslenskra aðila en ekki að forsetinn hugleiddi persónulega að höfða mál á hendur þeim.

Í hádeginu í dag sagði Ólafur Ragnar síðan að þýskur blaðamaðru Financial Times hafi dregið upp mjög villandi frásögn af löngu samtali sem hann átti við forsetann á Bessastöðum en haft er eftir Ólafi í blaðinu að Ísland eigi ekki að greiða þeim sem töpuðu á innlánum Kaupþings í Þýskalandi.

Ólafur segist hafa sagt blaðamanninum að Íslendingar hefðu ríkan vilja til þess að standa að málum á þann hátt að reynt verði að uppfylla að fullu skuldbindingar í öðrum löndum.

Ólafur sagðist einnig hafa sagt að þýskur almenningur verði að hafa á því skilning að þúsundir Íslendinga hafi orðið fyrir gríðarlegu tapi í kjölfar hruns bankanna. Þessvegna væri það röng mynd sem stundum væri dregin upp víða í Evrópu að það væri ætlun Íslendinga að hafa allt sitt á þurru á meðan aðrir ættu að taka á sig tapið.