Tveir menn gripnir vegna utanvegaaksturs

Lögreglan á Selfossi greip ökumenn glóðvolga sem höfðu ekið utanvegar á torfæru- og fjórhjóli.

Það var síðdegis í gær, föstudag, sem lögreglumennirnir frá Selfossi fóru í göngueftirlit eftir göngustíg vestan í Henglinum.

Tilgangurinn var að huga að utanvegaakstri torfæruhjóla og fjórhjóla.

Lögreglumennirnir gengu rúmlega sex kílómetra leið frá Bolavöllum til norðausturs um Húsmúla, Engidal og inn í Marardal.

Á leið sinni til baka suðvestur úr Marardal urðu þeir varir við tvö torfæruhjól sem var ekið inn í Marardal og þar eftir og utan við göngustíg.

Lögreglumennirnir snéru við og hittu á ökumennina innst inni í dalnum.

Mennirnir voru kærðir og mál þeirra sent til ákæruvalds.

Á svæðinu voru augljós og ljót merki um akstur torfæruhjóla og fjórhjóla.

Lögreglunni þykir það með eindæmum hvar menn komast á torfæruhjólum og má segja að fátt standi fyrir þeim annað en þverhníptir hamrar, segir í tilkynningu lögreglunnar.