James óttast að Portsmouth fari í greiðslustöðvun

David James, markvörður Portsmouth, segir að leikmenn óttist að félagið kunni að fara í greiðslustöðvun ef ekkert verður af Sulaiman Al Fahim.

Fullyrt er í enskum fjölmiðlum í dag að næsti sólarhringur skiptir sköpum þar sem Al Fahim mistókst að fá frest til að tryggja sér það fjármagn sem hann þarf til að kaupa félagið og í raun bjarga því frá gjaldþroti.

Félagið hefur þegar selt þá Peter Crouch og Glen Johnson í sumar fyrir háar upphæðir til þess að geta greitt niður skuldir.

James skilur reyndar ekkert í því hvernig félag sem hefur fengið 80 milljónir punda fyrir leikmannasölu undanfarin ár getur verið í svo erfiðri fjárhagsstöðu.

„Það er afar óvenjulegt að heyra orðið greiðslustöðvun í sömu setningu og úrvalsdeildarfélag, jafnvel þótt þetta séu enn bara vangaveltur," sagði James í samtali við enska fjölmiðla.

„Leikmenn skilja ekkert hvað er í gangi og velta því fyrir sér hver ætli verði sá næsti sem verður seldur."