Hólmar Örn: Það er mjög þægilegt að koma aftur í þetta lið

Keflvíkingar eru til alls líklegir í Pepsi-deildinni eftir 1-0 sigur á Fylki í Keflavík. Heimavöllur liðsins hefur þegar skilað 19 stigum í hús og í gær hélt liðið hreinu í fyrsta sinn í langan tíma.

Hólmar Örn Rúnarsson meiddist illa í fyrri leiknum á móti Fylki en í gær var það hans mark sem skildi á milli liðanna og skilaði liðinu þremur stigum.

„Þetta var allt annað heldur en síðast á móti Fylki enda miklu skemmtilegra að vinna og koma heill út úr þessu," sagði Hólmar Örn Rúnarsson sem skoraði eina markið á 58. mínútu eftir að Guðmundur Steinarsson hafði ógnað skoti inn í teig en missti boltann til hans.

„Ég tók bara sjensinn inn í teig, Gummi missir boltann aðeins frá sér og ég stal honum af honum," sagði Hólmar sem var himinlifandi með að hafa náð í öll stigin.

„Við erum farnir að halda hreinu sem skiptir okkur miklu máli. Þetta er langt í frá að vera flottasti leikur sem við höfum spilað en það eru skemmtilegustu sigrarnir að fá ekki á sig mark og ná síðan að setja eitt," sagði Hólmar og bætti við:

„Fylkir er núna með 23 stig eins og við. Við eigum Val næst þannig að þetta verður hörkubarátta hjá þessum liðum að slást um annað sætið. Þetta er þvílíkt mikilvægur sigur því annars hefði Fylkir verið komið sex stigum yfir okkur og þá hefði verið erfitt að ná þeim aftur," segir Hólmar sem gengur vel að komast aftur af stað eftir meiðslin.

„Ég er kannski ekki að hlaupa alveg jafnmikið og ég er vanur en ég fer þetta meira á klókindum. Þetta kemur hægt og bítandi hjá mér," sagði Hólmar sem þarna lék sinn annan leik eftir meiðslin sem héldu honum frá í tvo mánuði.

„Það er mjög þægilegt að koma aftur inn í þetta lið. Ég þekki mitt hlutverk vel og ég er ekkert að gera meira heldur en ég get núna," sagði Hólmar.