Harry Potter hættur með kærustunni

Daniel Radcliffe, stjarnan úr Harry Potter myndunum, er hættur með kærustunni sinni, samkvæmt heimildum News of the World. Radcliffe hitti sína heittelskuðu Laura O´Toole þegar þau tróðu upp saman í leikritinu Equus á West End. News of the World hefur það eftir Laura að sambandsslitin hafi verið í góðu. „Daniel og ég erum enn góðir vinir og skemmtum okkur vel þegar við hittumst. En við verðum bara að vera raunsæ," er haft eftir Laura. Neistin á milli þeirra tveggja kviknaði snemma á síðasta ári þegar þau æfðu ástarsenu í Equus, þar sem þau léku kærustupar. Þrátt fyrir að sýningum á leikritinu hafi lokið í maí héldu þau Daniel og Laura áfram að hittast á laun. En nú er fundum þeirra tekið að fækka.