Davíð Oddsson er ekki nógu skrítinn

„Þetta er tvímælalaust stærsta skref mitt sem eftirherma. Svo er bara spurning hvert þetta leiðir" segir Sólmundur Hólm, en hann vann eftirhermukeppni í þættinum Logi í beinni á föstudag með miklum glæsibrag.

Sóli, eins og hann er kallaður, nemur viðskiptafræði við HÍ milli þess sem hann hermir eftir. Hann segir hæfileikann ekki hjálpa sér í náminu - nema síður sé. „Maður verður svolítið annars hugar að reyna að ná prófessorunum, ég gerði mikið af því til að byrja með. Þetta er einhverskonar einhverfa, að geta þetta", segir Sóli.

Þetta er þó ekki eini ókosturinn við eftirhermuhæfileikann. Sóli segist varla vita hvernig söngrödd hann sé með, hann geti ekki sungið öðru vísi en að herma eftir söngvaranum. Hann segist af þessum sökum ekki gera mikið af því að raula með lögum Beyonce og stallsystra, en hafi hinsvegar náð aðdáunarverðum tökum á Shaggy.

Hann segist ekki búast við að byggja afkomuna á eftirhermum, en segir þó að bókanir á þorrablót hafi tekið kipp eftir þáttinn. Aðspurður hvort fólk panti þá sérstakar eftirhermur, segir hann það sjaldgæft, yfirleitt treysti menn hans dómgreind þar. Mikilvægt sé þó að spila eftirhermurnar eftir eyranu: „Ég tek til dæmis ekki Shaggy á Hrafnistu"

Sóli brá sér í ýmissa kvikinda líki í keppninni. Þegar talið berst að því hvort það sé einhver sem hann gæti alls ekki hermt eftir, viðurkennir hann það. „Davíð Oddsson, það eru ekki margir sem geta það. Hann er bara einhvernveginn ekki nógu skrítinn"