Brangelina fær miðil til að innrétta barnaherbergið

Þau Brad Pitt og Angelina Jolie hafa átt í stökustu vandræðum með að innrétta barnaherbergið fyrir tvíburana sína sem væntanlegir eru í heiminn í ágúst. Eins og önnur hver stjarna leituðu þau upprunalega til barnavöruverslunarinnar Petit Trésor í Beverly Hills um aðstoð. Þegar þau gátu svo alls ekki sammælst um hvaða mublur skyldi velja ákváðu þau að leita aðstoðar annars staðar. Hjá miðli.

Brad hafði langað í húsgögn í „sixtís" stíl, með hreinum nútímalegum línum, en Angelina vildi hinsvegar hefðbundið evrópskt barnaherbergi. Vinur fjölskyldunnar sagði við The Scoop að miðillinn hefði því verið fenginn til að meta "stemninguna" í kringum tvíburana. Sú stemning var - samkvæmt niðurstöðum miðilsins - meira stelpuleg en nútímaleg.

Svo fór því að Petit Tresor hóf handa við að innrétta barnaherbergið með bleikum borðaskreyttum vöggum í „Versailles" stíl, samsvarandi skiptiborðum og kommóðum og sérhönnuðum frönskum kristalsljósakrónum. Slúðurpressan hefur fjallað töluvert um kostnað við innréttingarnar, sem var sagður samsvara rúmum tíu milljónum króna. Heimildamaður slúðurdálksins sagði þó að herlegheitin væru öllu ódýrari, og hefðu ekki kostað nema sjö milljónir. Spottprís.