Barnapía borgarfulltrúa vill launin í Evrum

„Okkur fannst barnapían alveg vera með puttann á púlsinum þarna," segir Oddný Sturludóttir borgarfulltrúi og rithöfundur. Oddný greinir frá því á bloggsíðu sinni að hún og unnusti hennar, Hallgrímur Helgason, hafi verið að ræða kaup og kjör við sextán ára barnapíu sína eitt kvöldið þegar gengi krónunnar bar á góma.

„Það hefur náttúrulega ýmislegt breyst frá því hún byrjaði að passa fyrir okkur. Krónan hefur fallið gríðarlega síðan þá, og okkur fannst kominn tími á launaviðtal," sagði Oddný, þegar Vísir náði tali af henni. „Þá kom þetta upp, hvort það kæmi sér ekki betur fyrir hana að fá greitt í evrum."

Oddný segir að umræðurnar hafi nú mest verið í gamni, og ekki verið tekin ákvörðun um hvort orðið verður við óskum barnfóstrunnar. „Við erum að velta þessu fyrir okkur. Þetta er í nefnd, og verður tekið fyrir á fjölskyldufundi."