Villa reiðubúið að láta Barry fara

Martin O'Neill, knattspyrnustjóri Aston Villa, segir að félagið sé reiðubúið að láta Gareth Barry fara frá félaginu ef Liverpool er tilbúið að greiða uppsett verð.

Fyrir tveimur vikum var síðasta boði Liverpool hafnað en það hljómaði upp á þrettán milljónir punda. Talið er að Aston Villa sætti sig við ekkert minna en átján milljónir.

„Ef Liverpool er tilbúið að greiða það sem við metum hann á getur hann fengið ósk sína uppfyllta og farið frá Villa Park," sagði O'Neill.

Barry hefur gagnrýnt forráðamenn Villa fyrir vinnubrögð sín í málinu. „Þeir segjast vilja halda mér en ég hef ekki heyrt í knattspyrnustjóranum svo vikum skiptir. Það eru sjö vikur síðan að tímabilinu lauk og þó svo að stjórinn hefur fundið sér tíma til að vera sérfræðingur í sjónvarpslýsingum frá EM 2008 hefur hann ekki gefið sér tíma til að tala við mig."

Barry sagði enn fremur að Villa hafi ekkert boðið sér til að hvetja sig til að vera áfram hjá félaginu.

„Það er ekki aftur snúið," sagði Barry. „Það er kominn tími til að fara annað. Ég vill ólmur spila í Meistaradeildinni og þess vegna verð ég að fara frá Villa."