Sprenging við skrifstofur Kaupþings í Lundúnum

Verkamaður slasaðist alvarlega í sprengingu á gatnamótum Hanover og Regent stræti í miðborg Lundúna eftir hádegi í dag. Kaupþing banki hefur skrifstofur í nærliggjandi húsnæði.

Þegar Vísir hafði samband við skrifstofu forstjóra þar fengust þær upplýsingar að engum frá Kaupþingi hefði orðið meint af atvikinu.

Ekki hefði þurft að rýma húsnæði Kaupþings vegna þessa en lokað hefði verið fyrir aðalinngang að húsinu eftir að sprengingin varð og fólk hafi þurft að fara um hliðardyr.

Talið er að maðurinn sem slasaðist hafi skorið sig á rafmagnsvír með þeim afleiðingum að hann hlaut lífshættuleg brunasár á helmingi líkamans.

Ekki er talið að sprengingin hafi orðið af völdum hryðjuverka.