Ómannúðlegt ástand i Kenía

Öryggisráð Sameinuðu þjóðanna segir ástandið í Kenía vera ómannúðlegt og hvetur stjórnmálaleiðtoga þar í landi til þess að leysa stjórnarkreppuna sem þar ríkir með samningum og málamiðlunum.

Þetta eru fyrstu viðbrögð sem koma frá öryggisráðinu vegna óeirða sem hafa ríkt í landinu frá því að kosningar fóru þar fram í desember. Næstum eitt þúsund keníubúar hafa farist í átökum þar og 300 þúsund hafa særst. Leiðtogi stjórnarandstöðunnar, Raila Odinga, sakar Mwai Kibaki forseta um svindl í forsetakosningunum.

Í yfirlýsingu sinni krefst Öryggisráðið þess að Kofi Annan, fyrrverandi framkvæmdastjóri Sameinuðu þjóðanna, beiti sér fyrir sáttum í deilunni. Þá er þess jafnframt krafist að þeir sem beri ábyrgð á ódæðisverkum sem hafa verið framin síðan í desember verði látnir svara fyrir verk sín. Þá vill öryggisráðið að Odinga og Kibaki axli ábyrgð og finni pólitíska lausn á deilunni. Öryggisráðið segir jafnframt að uppræta þurfi glæpagengi og afvopna þau og tryggja þurfi að mannréttindi séu virt að nýju.

Utanríkisráðherrar frá Djibouti, Eþíópíu, Súdan, Úganda og Sómalíu eru komnir til Naíróbi höfuðborgar Kenía til fundar í Austur Afríkuráðinu, þar sem þeir hyggjast ræða ástandið í Kenía í dag.