Olofinjana til Stoke

Stoke City hefur staðfest að félagið sé búið að ganga frá kaupum á nígeríska landsliðsmanninum Seyi Olofinjana frá Wolves. Kaupverðið er í kringum þrjár milljónir punda.

Þessi 28 ára miðjumaður hefur skrifað undir fjögurra ára samning við Stoke sem komst upp í úrvalsdeildina á síðasta tímabili. Olofinjana er fyrrum leikmaður Brann í Noregi en Wolves keypti hann þaðan í júlí 2004.

Þá er Stoke að ganga frá kaupum á markverðinum Marton Fulop frá Sunderland. Þessi 25 ára ungverski leikmaður hefur ekki náð að vinna sér inn fast sæti hjá Sunderland síðan hann kom frá Tottenham.