Ferguson: Við hefðum átt að skora tíu mörk

Sir Alex Ferguson, stjóri Manchester United, segir að hans menn hefðu átt að skora miklu fleiri mörk en raun bar vitni þegar þeir lögðu kraftaverkalið Hull 4-3 í dag.

United komst í 4-1 með mörkum Nemanja Vidic, Michael Carrick og tveimur frá sjóðheitum Cristiano Ronaldo.

"Við erum dálitið aumir eftir þennan leik," sagði Ferguson við sjónvarpsstöð félagsins. "Við nýttum ekki færin okkar og það fer í taugarnar á mér. Við hefðum átt að skora tíu eða ellefu mörk í þessum leik, en við sóuðum færunum og vorum rétt búnir að klúðra dæminu," sagði Ferguson.

United komst upp fyrir Hull í deildinni með sigrinum en Ferguson gat fátt jákvætt tekið út úr sigrinum.

"Það eina jákvæða við þennan leik er það að við vorum að skapa okkur færi. Við spiluðum mjög vel á köflum en Ronaldo hefði átt að skora fjögur eða fimm mörk og ég veit ekki hvað Berbatov fékk mörg færi - en við hefðum átt að skora mun fleiri mörk," sagði Skotinn.