Wenger reiður vegna tæklinga leikmanna Stoke

Arsene Wenger, knattspyrnustjóri Arsenal, er allt annað en sáttur við leikstíl Stoke og segir liðið spila grófan fótbolta. Tveir leikmenn Arsenal meiddust í tapleiknum gegn Stoke á laugardag.

Wenger fordæmir Rory Delap og Ryan Shawcross eftir að Theo Walcott og Emmanuel Adebayor meiddust báðir.

„Heldurðu að Delap hafi verið að reyna við boltann þegar hann tæklaði Walcott?" spurði Wenger blaðamann. „Eða að Shawcross hafi verið að hugsa um boltann þegar hann tæklaði Adebayor af velli?"

Walcott og Adebayor verða ekki með þegar Arsenal mætir Fenerbahce í Meistaradeildinni á morgun. Þá er mjög líklegt að Adebayor missi af stórleiknum gegn Manchester United í úrvalsdeildinni næstu helgi en hann er meiddur á ökkla.

BBC hafði samband við Stoke City og bað um þeirra viðbrögð við ummælunum frá Wenger. Stoke vildi hinsvegar ekkert tjá sig um þau.

„Maður þarf að hafa hugrekki ef maður spilar fótbolta vitandi til þess að einhverjir séu sífellt að reyna að tækla þig aftan frá, án þess að hugsa um að ná boltanum. Eina markmiðið er að meiða einhvern," sagði Wenger.