Atkvæðagreiðslu um yfirvinnubann hjá hjúkrunarfræðingum lokið

Atkvæðagreiðslu um boðun yfirvinnubanns meðal hjúkrunarfræðinga lauk á miðnætti og mun stjórn Félags íslenskra hjúkrunarfræðinga hittast á fundi í hádeginu í dag og fara yfir niðurstöðuna.

Eftir því sem fram kemur á heimasíðu félagsins verður ákveðið þar hvort niðurstaðan verður tilkynnt að loknum stjórnarfundinum eða hvort beðið verður með það fram yfir fund með samninganefnd á miðvikudag.

Kosið var um það rafrænt hvort yfirvinnubann meðal hjúkrunarfræðinga sem starfa hjá ríkinu skyldi taka gildi frá 10. júlí. Elsa B. Friðfinnsdóttir, formaður Félags íslenskra hjúkrunarfræðinga, sagði í samtali við Vísi fyrir skemmstu að ef af yfirvinnubanninu yrði myndi skapast neyðarástand frá fyrsta degi.

Samningaviðræður félagsins við samninganefnd ríkisins hafa staðið frá því í um miðjan mars og hafa ekki borið árangur. Deilt er um það hversu mikið laun hjúkrunarfræðinga skuli hækka og býður ríkið sams konar samning og gerður var við BSRB á dögunum. Forsvarsmenn hjúkrunarfræðinga segja hins vegar að hann feli í sér kjararýrnun og vilja með aðgerðunum knýja ríkið til samninga.