Jay-Z og Beyonce skreyta fyrir fúlgur fjár

Hvorki meira né minna en sextíu þúsund hvítar orkídeur þurfti til að skreyta íbúð rapparans Jay-Z fyrir brúðkaup hans og Beyonce um helgina.

Amy Vongpitaka, eigandi blómabúðar í smáþorpinu Nok Nok Khai í Taílandi sagði við E! Online að hundrað þúsund orkídeur hefðu verið klipptar í síðustu viku fyrir brúðkaupið, en einungis þær 60 þúsund bestu hefðu ratað til New York til að skreyta í brúðkaupinu.

Þar tók blómaskreytingarhönnuður við þeim, og fléttaði þær í blómsveiga sem héngu úr loftunum. Að sögn Amy eru orkídeurnar fyrsta flokks, sömu gerðar og þær sem kóngurinn í Taílandi kaupir í hverjum mánuði. Hún vildi ekki gefa upp hvað þær kostuðu, en samkvæmt útreikningum E! gæti kostnaðurinn hlaupið á tveimur milljónum dollara, eða sem samsvarar um 150 milljónum króna.