Seinfeld veltir bremsulausum Fiat

Grínarinn Seinfeld slapp með skrekkinn þegar bremsur á bíl hans biluðu með þeim afleiðingum að hann valt.

Seinfeld var á ferðalagi í öldruðum Fiat sínum í ríkramannabænum Hamptons þegar bremsurnar gáfu sig. Hann reyndi að rífa í handbremsuna, en allt kom fyrir ekki, og bíllin stefndi beint framan á aðvífandi umferð. Grínarinn tók þá ákvörðun að sveigja harkalega til hægri út af veginum. Bíllin valt tæpan heilan hring og staðnæmdist loks á bílstjórahliðinni.

Að sögn lögreglu á staðnum afstýrði Seinfeld með þessu stórslysi. Hann slapp ómeiddur frá slysinu, en það sama verður ekki sagt um Fíatinn. Það ætti þó ekki að koma að sök en Seinfeld er mikill bíladellukall, og er meðal annars talinn eiga eina 47 Porche bíla.

Grínistinn gerði sjálfur lítið úr slysinu í fjölmiðlum vestanhafs. „Af því ég veit að það eru börn að hlusta þarna úti vil ég að þau viti að það að keyra án bremsa er ekki eitthvað sem ég mæli með. Ekki nema þú hafi verið þjálfaður sem trúður eða grínisti - eins og ég. Þetta er samt ekki eitthvað sem ég ætla að leggja í vana minn."