Landsmenn drukku að meðaltali 7,5 lítra af alkóhóli í fyrra

Hver landsmaður eldri en 15 ára neytti samtals rúmlega 7,5 alkóhóllítra í fyrra samkvæmt samantekt Hagstofunnar. Er það aukning um 0,3 lítra frá árinu á undan.

Alls keyptu landsmenn nærri 25 milljónir lítra af áfengi í fyrrra sem er sjö prósentum meira en árið á undan. Þá nam salan rúmlega 23 milljónum lítra.

Fram kemur í tölum Hagstofunnar að sala á sterkum drykkjum hafi aukist á ný á allra síðustu árum en sala þeirra hafði minnkað milli ára flest árin frá árinu 1989 þegar sala á bjór var leyfð. Neysla gosblandaðra drykkja, sem eru að grunni til sterkir drykkir, hefur aukist mikið frá árinu 2000.

Eilítið hefur hægt á hinni miklu aukningu sem var í sölu á léttum vínum í mörg ár, en sala á hvítvíni jókst þó mikið milli áranna 2006 og 2007 og hefur aukist sérstaklega mikið síðustu sex árin. Hlutfall bjórs í heildarsölu áfengis í alkóhóllítrum talið hefur verið nokkuð stöðugt eða um 52 prósent hin síðari ár.