Um 440 þúsund sóttu leikhús í fyrra

Áætlað er að um 440 þúsund manns hafi sótt sýningar leikhúsa, atvinnuleikhópa og áhugaleikfélaga hér á landi á leikárinu 2006-2007. Þessi fjöldi samsvarar því að hver landsmaður sæki leikhús 1,4 sinnum á ári.

Fram kemur á vef Hagstofunnar að leikuppfærslur hafi samtals verið tæplega 250 og heildarfjöldi sýninga rétt um 2.800. Tölur Hagstofunnar sýna enn fremur að frá árinu 2000/2001 til síðasta leikárs hafi hafi gestum fjölgað um tæplega 48 þúsund, eða um 12 af hundraði. Heildarfjöldi leiksýningargesta á síðasta leikári nam nærri 30 prósentum af heildaraðsókn kvikmyndahúsanna árið 2006.

Sjö atvinnuleikhús með aðstöðu í sex leikhúsum voru starfrækt á síðasta ári. Á vegum þeirra voru 13 leiksvið með um 3.000 sætum. Leikhúsin settu 95 uppfærslur á svið hér innanlands, þar af voru leikrit flest, eða 63 talsins.

Samanlagður fjöldi sýninga var 1.224. Uppærslur með verkum eftir íslenska höfunda voru 37, en eftir erlenda 51. Uppfærslur með verkum eftir innlenda og erlenda höfunda voru sjö. Leikhúsgestir voru tæplega 260 þúsund að meðtöldum samstarfsverkefnum og gestasýningum. Sýningargestum fækkaði lítillega frá fyrra leikári, eða um nærri þrjú þúsund.

Atvinnuleikhópum hefur fjölgað umtalsvert

Atvinnuleikhópum hefur fjölgað talsvert undanfarin ár, eða úr 22 leikárið 2000/2001 í 38 í fyrra. Uppfærslum á þeirra vegum hefur fjölgað að sama skapi, en á síðasta leikári færðu atvinnuleikhópar upp á svið innanlands 79 verk samanborið við 30 á leikárinu 2000/2001.

Tölur Hagstofunnar sýna enn fremur að á næstliðnu leikári voru starfandi 40 áhugaleikfélög víðs vegar um landið. Uppfærslur á vegum félaganna voru á síðasta leikári 89 eða litlu fleiri en á leikárinu á undan. Tvær af hverjum þremur uppfærslum voru eftir innlenda höfunda. Samanlagður fjöldi flytjenda á síðasta leikári var um 1.450 manns. Félögin sýndu 498 sinnum fyrir um 30 þúsund gesti.