Kínverjar vilja viðræður við Dalai Lama

Forsætisráðherra Kína er reiðubúinn að hefja viðræður við Dalai Lama. Þetta hefur Gordon Brown forsætisráðherra Bretlands eftir Wen Jiaobao, en þeir ræddust við í dag.

Róstur hafa haldið áfram í héruðum sem liggja að Tíbet. Myndir sem kínversk yfirvöld birtu í dag sýna munka og aðra mótmælendur á götum úti, rífa kínverska fána, kveikja elda og ráðast á Kínverja.

En á sama tíma segja ráðamenn í Pekíng að búið sé að koma á nógu mikilli ró í Tíbet að óhætt sé að láta ólympíueldinn fara þar um, eins og ráð var fyrir gert, í aðdraganda ólympíuleikanna í Pekíng í ágúst.