Gagnrýna lyfjagreiðslunefnd fyrir villandi tilkynningar

Samtök verslunar og þjónustu gagnrýna lyfjagreiðslunefnd fyrir tilkynningar nefndarinnar til fjölmiðla þar sem borið er saman heild- og smásöluverð á lyfseðilskyldum lyfjum á Íslandi og annars staðar á Norðurlöndum.

Benda þau á að hvergi komi fram að lyfjagreiðslunefnd ákveði heildsölu- og smásöluverð þessara lyfja hér á landi. Það sé eðilegt að einhver annar en nefndin sjálf leggi mat á það hvort nefndin sinni sínu hlutverki.

Samtök verslunar og þjónustu benda enn fremur á að verðsamanburður á 20 kostnaðarsömustu lyfjunum á Íslandi, í Danmörku, Svíþjóð og Noregi sýni að þau séu að meðaltali 7,5 prósentum dýrari í Danmörku en hér á landi, 6,9 prósentum ódýrari í Noregi en hér og 2,7 prósentum dýrari í Svíþjóð en hér.

Til viðbótar veiti íslensk apótek mismunandi afslátt frá opinberu verði vegna samkeppni þeirra á milli en í Danmörku, Noregi og Svíþjóð sé bannað að veita afslátt af lyfseðilsskyldum lyfjum.

„Þess ber þó að geta að einstök lyf eru mun dýrari hér og önnur mun ódýrari, auk þess sem gengi gjaldmiðla á hverjum tíma hefur áhrif. Sem dæmi má nefna að daginn sem verðsamanburðurinn var gerður kostuðu 30 töflur af Casodex, hormónalyfi sem er algengt í krabbameinsmeðferð, sem svarar 56.309 kr. í Danmörku en 48.514 kr. á Íslandi. Þar er verðmunurinn 7.795 kr. íslenskum apótekum í vil. Aftur á móti kostuðu 98 töflur af Simvastatin, lyfi sem er blóðfitulækkandi, sem svarar 2.101 kr. í Danmörku en 4.239 kr. á Íslandi. Þær eru með öðrum orðum 2.138 kr. dýrari hér en í Danmörku," segir í tilkynningu SVÞ.