Þrír teknir á dag fyrir fíkniefnaakstur

Níutíu og sex manns voru gripnir fyrir akstur undir áhrifum ávana- og fíkniefna í febrúar síðastliðnum og hafa ekki verið fleiri frá því í ágúst í fyrra.

Þetta kemur fram í bráðabirgðatölfræði Ríkislögreglustjóra yfir afbrot í febrúarmánuði. Þessi fjöldi fíkniefnaakstursbrota þýðir að um þrír voru að meðaltali teknir á dag fyrir þess konar brot í mánuðinum.

Tölur Ríkislögreglustjóra sýna enn fremur að ölvunarakstursbrotum, áfengislagabrotum og líkamsmeiðingum fjölgaði milli febrúarmánaðar í ár og sama mánaðar í fyrra.

Tilkynnt var um 115 líkamsmeiðingar til lögreglunnar í febrúar sem er um 17 prósenta aukning miðað við sama tíma í fyrra. Ölvunarakstursbrotum í febrúar fjölgaði um rúm sjö prósent milli ára en mest varð fækkunin í brotum vegna aksturs gegn rauðu ljósi en þeim fækkaði um 46 prósent milli ára.