Mál Jónínu Ben fyrir mannréttindadómstól Evrópu

Mannréttindadómstóll Evrópu hefur samþykkt að taka upp kæru Jónínu Benediktsdóttur á hendur íslenska ríkinu vegna brota á mannréttindasáttmálanum. Kæran var send eftir að dómstólar landsins höfnuðu kröfu Jónínu um að setja lögbann á birtingu tölvupósta tengda Baugsmálinu.

Árið 2005 var linnulítið fjallað um Baugsmálið í fjölmiðlum og þá um haustið birti Fréttablaðið tölvupósta sem farið höfðu milli Jónínu Benediktsdóttur og ýmissa nafngreindra aðila. Fyrsti pósturinn var birtur í Fréttablaðinu 24. september og vakti gríðarlega athygli. Sá póstur var frá Styrmi Gunnarssyni ritstjóra Morgunblaðsins til Jónínu og þar féllu meðal annars hin fleygu orð um að málið væri eins innmúrað og innvígt og nokkur hlutur gæti verið. Brot úr tölvupóstunum birtust í þrjá daga samfleytt, en í þeim komu fram ýmsar upplýsingar um aðdraganda Baugsmálsins og gáfu þeim orðrómi byr undir báða vængi að málið ætti sér pólitískar hliðar.

Dómstólar hér höfnuðu kröfu Jónínu um lögbann - á þeim forsendum að innihald tölvupóstanna hefði átt erindi til almennings.

Jónína kærði þá íslenska ríkið til Mannréttindadómstóls Evrópu fyrir brot á mannréttindasáttmálanum um rétt til friðhelgi einkalífs og bréfaskipta. Dómstóllinn hefur tekið málið upp og gefur ríkisstjórn Íslands frest til 26. júní til að svara spurningum dómstólsins eða ljúka málinu með sátt.