Laganemar aðstoða nýbúa við gerð skattframtala

Næsta miðvikudag verður „skattadagur" í Alþjóðahúsinu. Þá munu laganemar Háskólans í Reykjavík ásamt sérfræðingum frá Deloitte aðstoða við gerð skattframtala á efstu hæð Alþjóðahússins frá klukkan níu að morgni til níu um kvöld.

Síðastliðið ár hefur Lögrétta, félag laganema við Háskólann í Reykjavík, boðið innflytjendum lögfræðiaðstoð að kostnaðarlausu. Í ljós kom að á því tímabili sem skattgreiðendur skila framtölum sínum annaði kerfið ekki því að veita öllum þeim sem á aðstoð þurftu að halda framtalsleiðbeiningar. Var það kveikjan að samstarfi Lögfræðiaðstoðar Lögréttu, Alþjóðahúss og Deloitte.

Munu laganemar standa vaktina allan daginn þann 19. mars og taka á móti innflytjendum sem þurfa á framtalsaðstoð að halda og munu sérfræðingar frá Deloitte verða þeim til trausts og halds, eftir því sem fram kemur í tilkynningu Deloitte.