Sterkari grunur í dag en í gær um íkveikju í Hrafnhólum

Sterkur grunur er um að kveikt hafi verið í íbúð í fjölbýlishúsi að Hrafnhólum 6-8 í gær.

Eldurinn kviknaði í íbúð á annarri hæð en húsið er átta hæða og í því búa um tvö hundruð manns. Enginn var í íbúðinni þegar eldurinn kom upp en hún er í útleigu á vegum Félagsbústaða.

Friðrik Smári Björgvinsson, yfirlögregluþjónn hjá lögreglunni á höfuðborgarsvæðinu, segir rannsókn málsins enn í fullum gangi en meðal þess sem skoðað er eru upptökur úr eftirlitsmyndavél í anddyri fjölbýlishússins við Hrafnhóla.

Aðspurður hvort grunurinn um íkveikju sé sterkari í dag en í gær svarar Friðrik Smári því játandi. Þá segir hann ekki hægt að upplýsa um það á þessu stigi málsins hvort tiltekinn aðili liggi undir grun.