Spurt hvort hið opinbera eigi að ábyrgðartryggja börn í skólastarfi

Stjórn Heimilis og skóla hefur sent frá sér yfirlýsingu vegna hins svokallaða Mýrarhúsaskólamáls, þar sem móðir var dæmd til að greiða kennara tæpar tíu milljónir króna í bætur þegar dóttir hennar skellti hurð á kennarann. Í yfirlýsingunni segir að stjórn samtakanna hafi almennt ekki tjáð sig efnislega um einstök mál og að haldið verði í þá reglu í þessu máli. Öll umræða sé hins vegar af hinu góða og segir í yfirlýsingunni að áleitnar spurningar hafi vaknað í kjölfar dómsins.

„Útgangspunkturinn í dóminum er sú staðreynd að börn geta verið skaðabótaskyld á grundvelli sakar vegna tjóns sem þau valda öðrum og foreldrar verða að vera meðvitaðir um það," segir í yfirlýsingunni. „Dómurinn ætti því að vekja foreldra til umhugsunar um hvernig tryggingamálum fjölskyldunnar sé hagað."

Þá segir að dómurinn veki upp áleitnari spurningar. „Má þar nefna spurninguna um hvort það sé eðlilegt að börn séu ábyrgðartryggð í skólastarfi á kostnað opinberra aðila vegna líkamstjóns sem þau valda samnemendum eða kennurum sínum. Slíkt gæti hvoru tveggja verið til hagsbóta fyrir tjónþola, sem ætti þá auðveldara með að fá bætur greiddar, sem og börnin sjálf."

Þá segir einnig í yfirlýsingunni að umræða um málið í fjölmiðlum og í þjóðfélaginu hafi að einhverju leyti verið á „villigötum, verið á villigötum, t.d. hvað varðar meinta ábyrgð foreldris, fjárhæð skaðabóta, mat á bótahæfi stúlkunnar, því að fram hafi komið „kæra" o.fl."

Yfirlýsinguna í heild sinni má lesa hér.