Danskir hermenn áfram í Afganistan þrátt fyrir mannfall

Anders Fogh Rasmussen, forsætisráðherra Danmerkur, segir að danskir hermenn muni áfram starfa í Afganistan þrátt fyrir að tveir þeirra hafi fallið í morgun.

Þeir létust ásamt einum öðrum hermanni í sjálfsmorðssprengjuárás sem talið er að beint hafi verið að NATO-liðum í hinu róstursama Helmand-héraði í suðurhluta Afganistans. Enn fremur særðust fjórir hermenn í árásinni.

Rasmussen lýsti yfir mikilli sorg vegna mannfallsins og gagnrýndi harðlega árásina. Sagði hann herskáa hópa í Afganistan reyna að hindra framþróun í landinu og það skyldi þeim ekki takast. „Dönsku hermennirnir leggja mikið af mörkum til þess að aðstoða afgönsku þjóðina. Hugur minn er því einnig hjá félögum hinna föllnu hermanna," sagði Rasmussen og bætti við: „Stöðugleiki í Afganistan er einnig mikilvægur fyrir öryggi Danmerkur. Þess vegna mun danska ríkisstjórnin áfram styðja viðleitni til að koma á stöðugleika og framþróun í landinu."