Aflaverðmæti um 80 milljarðar í fyrra

Aflaverðmæti íslenskra skipa var fimm prósentum meira í fyrra en árið 2006 samkvæmt samantekt Hagstofunnar. Alls nam aflaverðmætið 80 milljörðum í fyrra en var rúmir 76 milljarðar árið á undan.

Mest fékkst fyrir botnfisk í fyrra, eða um 60 milljarðar króna, og jókst aflaverðmæti hans um tæp fimm prósent. Verðmæti þorsks var um helmingur þeirrar upphæðar, eða rétt tæpir 30 milljarðar króna en aflaverðmæti ýsu nam 14,5 milljörðum sem er 27 prósenta aukning frá árinu 2006. Aflaverðmæti karfa og ufsa dróst hins vegar saman milli ára.

Þá jókst aflaverðmæti uppsjávarafla um 15,5 prósent milli ára og nam 14,5 milljörðum. Munar þar mestu um 95 prósenta aukningu á verðmæti loðnu sem nam 4,2 milljörðum í árslok 2007. Aflaverðmæti síldar nam 5,7 milljörðum á síðasta ári og dróst saman um rúm tíu prósent á milli ára og svipaða sögu er að segja af kolmunna.

Enn fremur nam verðmæti rækju 226 milljónum í fyrra og dróst saman um rúmlega fimmtung milli ára.