Aflaverðmæti upp á 250 milljónir króna

Frystitogarinn Venus kom til hafnar í Reykajvík í dag með afla að verðmæti 250 milljónum króna. Hásetahluturinn einn nemur tveimur og hálfri milljón króna.

Venus lagðist að bryggju við Norðurgarð í Reykjavíkurhöfn síðdegis í dag eftir 40 daga veiðitúr í Barentshafi. Það er HB Grandi sem gerir út frystitogarann.

Áhöfninni var að sjálfsögðu vel fagnað af ástvinum sem biðu á hafnarbakkanum.

Guðmundur Jónsson, skipstjóri á Venus segir að veiðin hafi gengið vel þó veður hafi verið slæmt í byrjun. Alls veiddust um 950 tonn af þorski og er verðmæti aflans um 250 milljónir króna. Er það með því mesta sem þekkist. Hásetahluturinn eftir veiðiferðina er því tvær og hálf milljón króna.