Stúlkan frá Bitrufirði ekki alvarlega slösuð

Átta ára gömul stúlka sem flutt var á með þyrlu á slysadeild Landspítalans í Fossvogi frá Bitrufirði eftir slys í dag reyndist ekki alvarlega slösuð. Stúlkan og maður skullu saman þar sem þau voru að renna sér á plastpokum. Manninn sakaði ekki en grunur lék á áverkum á hálsi, höfði og brjóstkassa stúlkunnar samkvæmt upplýsingum sjúkraflutningamanna á Hólmavík.

Lögreglan kom með stúlkuna til móts við sjúkraflutningamenn frá Hólmavík á börum, en 50 kílómetrar eru á milli staðanna.

Slysið átti sér stað rétt eftir hádegi í dag. Þyrlan lagði af stað frá Hólmavík klukkan 14 og lenti í Fossvogi klukkan 15.