Áttatíu fallnir í átökum í Tíbet

Áttatíu manns hafa fallið undanfarna daga í átökum milli Tíbeta og kínverskra stjórnvalda, að sögn tíbetsku útlagastjórnarinnar í Indlandi. Tugir til viðbótar hafa slasast. Lhasa, höfuðborg Tíbet er nánast í herkví lögreglu- og hersveita. Íbúarnir hætta sér ekki út fyrir dyr.

Dalai Lama, andlegur leiðtogi landsins hefur hvatt kínversk stjórnvöld til þess að sýna stillingu. Hann vísar því á bug að hann standi á bakvið mótmælin sem hófust í síðustu viku.

Í Kína hafa hinsvegar brotist út óeirðir. Lögreglan segir að Tíbetar hafi kastað bensínsprengjum og brennt lögreglustöð í Aba héraði sem á landamæri að Tíbet.

Hermenn hafa verið sendir til að standa vörð um opinberar byggingar.

Dalai Lama sagði að þjóðir heims bæru siðferðilega ábyrgð gangvart Tíbet. Hann tók fram að hann efaðist ekki um rétt Kína til þess að halda Ólympíuleikana.

Margar þjóðir hafa líka brugðist við með því að skora á Kínversk stjórnvöld að fara mildum höndum um mótmælendur.

Kínverjar hafa hinsvegar brugðist við með því að lýsa yfir stríði þjóðarinnar gegn stuðningi við Dalai Lama. Það þykir benda til þess að þeir muni áfram berja niður öll mótmæli með sömu hörku og hingað til.

Talsmaður stjórnvalda ítrekaði að Tíbet væri hérað í Kína.

Þetta hérað hefði að vísu sjálfstjórn, en væri óaðskiljanlegur hluti af Kína, rétt eins og Tævan, sem Kínverjar gera einnig tilkall til.